Eigandi fasteignarinnar Austurstræti 16 í Reykjavík  hefur samþykkt kauptilboð dótturfélags Regins  hf.  í alla eignina.  Fasteignin sem byggð var á árunum 1916 - 1918 og  þekkt er sem gamla Reykjavíkurapótek er 2.773 m² að stærð. Eignin er ein af perlum Reykjavíkurborgar og stendur við Austurvöll. Hönnuð af Guðjóni Samúelssyni, arkitekti og húsameistara ríkisins. Húsið á sér merkilega sögu í íslensku athafnalífi og er samofið uppbyggingu og sögu Reykjavíkurborgar. Húsið er friðað að utan, einnig tekur friðun til stigagangs að sunnan og innréttinga sem áður stóðu í apóteki.

Reginn telur eignina bjóða upp á mikla möguleika vegna einstakrar staðsetningar í miðbæ Reykjavíkur og nálægð við þjónustu, veitingastaði og menningalíf. Reginn hefur hug á því að fara í samstarf við öfluga aðila varðandi nýtingu hússins undir hótel-  og veitingarekstur.  Vandað verður til verka hvað varðar hönnun og breytingu innanhúss.

Áætlað er að kaupsamningur verði undirritaður í október 2013.

Kaup þessi eru innan ramma fjárfestingastefnu Regins sem felur meðal annars í sér að auka hlut í húsnæði  tengdu ferðaiðnaðinum.  Kaupverðið er trúnaðarmál.