Heimar hafa undirritað viljayfirlýsingu við Grundarheimilin og Klasa um uppbyggingu á nýjum lífsgæðakjarna á þróunarreit á Borgarhöfða í Reykjavík. Áætlað er að margvísleg heilsutengd þjónusta verði í kjarnanum, þar á meðal 100 rýma hjúkrunarheimili í rekstri Grundarheimilanna, þjónustumiðstöð og 160 íbúðir fyrir 60+. Fyrirkomulag, uppbygging og rekstur þessa nýja kjarna verður með áþekkum hætti og Grund rekur í dag í Mörkinni við Suðurlandsbraut 58 – 70.

Þá er stefnt að opnun líkamsræktarstöðvar sem þjónað geti öllum íbúum Borgarhöfðans og einnig kemur til greina að koma fyrir annarri heilsutengdri þjónustu í kjarnanum auk þess sem skoðað verður hvort heilsugæslustöð gæti orðið hluti af verkefninu. Gert er ráð fyrir að íbúar þessa nýja borgarhluta í Reykjavík geti verið í kringum fimmtán þúsund talsins fyrir utan þann mikla fjölda sem mun sækja vinnu og ýmsa þjónustu þangað á hverjum degi.

Stefnt er að því að fyrstu íbúar lífsgæðakjarnans geti flutt inn árið 2027 eða 2028. Þó er það með þeim fyrirvara að samningar náist við hið opinbera um rekstur hjúkrunarheimilisins og að lokið verði við samningsgerðina í kjölfar viljayfirlýsingarinnar.

Heimar hafa unnið að verkefninu í nánu samstarfi við Klasa sem er að þriðjungi í eigu Heima. Klasi er þróunarfélag með mikla þekkingu í þróun nýrra uppbyggingarsvæða frá grunni. Klasi hefur til að mynda leitt uppbyggingu á 201 Smára, nýju borgarhverfi sunnan Smáralindar. Félagið heldur á mörgum áhugaverðum þróunarreitum á höfuðborgarsvæðinu sem eru komnir mislangt í uppbyggingu eða alls yfir 120 þúsund lóðarfermetrum. Meðal eigna Klasa eru lóðir á Borgarhöfða en gert er ráð fyrir lífsgæðakjarnanum í hluta þess verkefnis.

Borgarhöfði er nýr borgarhluti í Reykjavík þar sem íbúabyggð, þjónusta og atvinnulíf munu þróast saman næstu árin. Deiliskipulag á því svæði sem Klasi hefur þróað á Borgahöfða síðustu ár liggur fyrir og framkvæmdir eru nú þegar hafnar. Gert er ráð fyrir því að eftir rúm 2 ár þá gætu tæplega 600 íbúðir verið komnar í notkun eða á síðustu stigum framkvæmda.

Á Borgarhöfðanum verður öll helsta nærþjónusta í göngufæri s.s. matvöruverslun, minni smávöruverslanir, menningarhús, útivistarsvæði og önnur fjölbreytt atvinnustarfsemi. Í uppbyggingu hverfisins er áhersla á alla aldurshópa og lífsgæði þeirra. Við Krossamýrartorg í hjarta borgarhlutans verður ein af stoppistöðvum Borgarlínu, en ljúka á við hana í fyrstu lotu Borgarlínuverkefnisins.

A real estate comp­any for a new fut­ure

A real estate company for a new future