Landsbankinn hefur ákveðið að bjóða til sölu allt að 75% hlutafjár í fasteignafélaginu Reginn hf. í hlutafjárútboði sem fer fram dagana 18. og 19. júní 2012. Stefnt er að skráningu Regins á Aðalmarkað NASDAQ OMX Iceland hf. (Kauphallar Íslands) í kjölfar útboðsins. Megin markmið Landsbankans með útboðinu er að Reginn uppfylli skilyrði Kauphallarinnar um dreifingu hlutafjár og að almenningur jafnt og fagfjárfestar eignist hlut í félaginu.

Verðbil í útboðinu hefur verið ákveðið og verður það 8,1 – 11,9 krónur á hlut. Þetta samsvarar því að markaðsverðmæti alls hlutafjár Regins sé á bilinu 10,5 – 15,5 milljarðar króna. Þetta er lækkun frá því sem áður hefur verið kynnt, en þá var markaðsverðmæti alls hlutafjár á bilinu 14,2 – 18,3 milljarðar króna.

Lækkunin er ákveðin til að tryggja farsæla skráningu Regins hf. og stuðla að þátttöku almennings og fjárfesta í uppbyggingu íslensks hlutabréfamarkaðar.

Landsbankinn áfram hluthafi í Regin hf.

Landsbankinn hefur einnig ákveðið að halda eftir 25% eignarhlut í Regin og skuldbindur sig til þess að selja þann eignarhlut ekki í 10 mánuði eftir skráningu í Kauphöll. Með því vill bankinn undirstrika að hann hefur mikla trú á félaginu og framtíð þess.

Fyrirkomulag útboðsins

Útboðið er tvískipt og býður Landsbankinn til sölu 975.000.000 hluti eða sem nemur 75% af útgefnum hlutum í Regin hf.:

• Í tilboðsbók, þar sem kauptilboð skal vera að lágmarki 50 milljónir króna, eru til sölu 633.750.000 hlutir eða 48,75% af heildarhlutafé.
• Í áskriftarhluta er tekið við kauptilboðum sem numið geta á bilinu 100.000 – 49.999.999 krónur. Í þeim hluta eru til sölu 341.250.000 hlutir eða 26,25% af heildarhlutafé Regins.

Útboðið hefst kl. 10:00 þann 18. júní 2012 og lýkur kl. 16:00 þann 19. júní 2012. Ekki er tekið við áskriftum utan þessa tímabils.

Útboðið er markaðssett á Íslandi og skilyrði fyrir þátttöku í útboðinu er að kaupendur hafi íslenska kennitölu og séu fjárráða.

Landsbankinn mun falla frá útboðinu ef eftirspurn í útboðinu verður ekki nægjanleg til að ná megin markmiði útboðsins varðandi dreifingu hlutafjár eða ef ekki næst að selja yfir 50% af heildarhlutafé félagsins.
Lýsing verður birt þann 11. júní 2012 á vef Regins, www.reginn.is og á vef Landsbankans, www.landsbankinn.is. Prentuð eintök af lýsingunni má nálgast í höfuðstöðvum Regins að Hagasmára 1, 201 Kópavogi.